如果真係可以做一個全港性嘅民調,六合彩嘅支持率肯定比梁特多幾百倍百份點。

六合彩同梁特真係一個完完全全嘅opposite。六合彩真係香港人嘅希望黎架!

 

試問有邊個唔想中?有,一定有,應該就係個班幾百億身家嘅吸血鬼,未必咁想中。

 

「下,得個幾千萬又要落去馬會,又要排隊,太麻煩啦。呢啲野都係留返比你地班窮人做啦。」

 

總之,香港人對六合彩嘅瘋狂程度可以係去到一個禪嘅境界。係前日先知,原來六合彩都有得計,仲有得搵師父預測,聽講話仲有班人做專做六合彩技術分析。

嘩屌,真係行行出狀元。

 

其實講到底,只要有錢搵香港人就會痴線,但係有咩痴線得過,你可以用幾十蚊嘅價錢,一夜之間黎換到幾千萬咁癲?

 

我同好多香港人一樣,夢想就係中六合彩,因為只有中咗六合彩,你先至有資格先去追求自己真正嘅「夢想」。

 

*夢想與年齡成反比例*

 

細個我有好多夢想,做偉大嘅畫家,即係類似梵高個種,死後幅畫要賣幾千萬都要仲有大把人爭;大個少少就想做DANCER,又想做演員發下明星夢;到大個出黎做野,就開始只係想搵大錢,慢慢變成希望份人工可以多返少少,再變成希望今個月唔使做咁多野,再退化成,我只希望排到公屋上樓。

 

因為你越接近現實,你就知道夢想唔係鳩up幾句就搞得掂。

佢係需要經歷定位,嘗試,失敗,探索,了解,合作,再定位,嘗試,失敗,探索,了解,合作,再配合埋勇氣,智慧,運氣同命水,你先至有機會達成。

當中個或然率,同你買六合彩中頭獎金多寶,仲要一個注中係差唔多咁上下難。

除非,你只係諗住中返廿蚊回本。(利申:只係中過一次咁大把)

 

*搞清楚,你嘅夢想性質*

 

雖然我份人咁現實又負面,但我從來都唔會叫人放棄夢想更加唔會取笑別人夢想。(那,除非你本身個人黑鳩我憎嘅姐)

 

有種人嘅所謂夢想只可能係一個想法,即係「如果乜乜乜乜就好啦」

膚淺!但我都係,所以我會買六合彩。

因為人真係需要某種虛幻嘅希望黎到維持自己嘅生命值架!

 

「屌,呀吹,你唔好傻啦,馬會期期都自己中返架」

 

係?是但啦,賭徒係諗住玩21點贏錢嘅咩?係嘅話,佢地玩完第一晚佢就唔會再返黎澳門啦!因為佢地要嘅係「刺激感」,不論輸贏佢地都會需要有呢種「刺激感」

(由於我目的係贏錢,所以我去過一次賭場就無再返入去)

同樣地,我地都係需要一個「希望」,等自己嘅生命值回返少少血。

 

「你橫掂都係唔中架啦,買黎做乜姐。」

 

「你橫掂都係會死架啦,你買飯黎做乜姐。」

結果我個同事最後決定唔去食日本餐廳,同我一齊買咗張七個字全注,價值70蚊。

玩姐,開心下姐,你睇AV都唔會諗住宇都宮飛出黎幫你含架啦。

 

但如果你唔係以上個種,咁你更加細讀以下內容。

 

*夢想的機會成本*

 

正如我之前所講,夢想係需要一堆水蛇春咁長嘅野。所以,你更加需要買六合彩。

因為大部份人嘅問題都係離不開個「錢」字。

 

經濟學上黎講,選擇就會造成機會成本。就如你選擇行A,就等如你放棄B。

簡單少少,就係如果你只有50萬,一係你就整臉,一係你就隆對胸。

 

所以第一樣野就係要諗「放棄啲咩」!但當我諗過哂,我就發覺自己真係無咩野可以放棄到,因為我真係乜都無。

 

假設呀爸70歲,呀媽仲要返三份工,細佬係長期病患,細妹先得10歲,你仲敢膽就走同人講:「我要入TBB藝員訓練班!」

雷公唔劈你,啲狗都吠啦!經濟問題,永遠都人最令人煩惱啲關口,自己窮無所謂,但要帶埋親人同你一齊捱窮,絕對係大部人都唔願意。

所以好多人都決定,死死地去返份工,夢想?食得飽咩?

 

單靠夢想當然食唔飽人,不過機會成本可以由自己決定。

唔考TBB,咪試下兼職做演員囉;做唔到全職音樂家,咪得閒同班朋友夾下歌。達成唔到100%,但我至少都做過50%

當你肯踏出第一步,就算唔成功起碼你都比個交代自己,唔會到熄燈個日後悔得太多。

 

我做唔到劉德華,但至少我唔係劉江華!

 

*笑,笑你老母*

 

其實呢篇文章係一位網友希望我寫,其實我自己都好想寫篇六合彩,咁岩佢又叫我寫,順水推丹,唔使多謝。

 

人人都有夢想,當然永遠都有種仆街會笑鳩人夢想(個個可能係我,哈哈)

我都試過,起初都會覺得難受,不過慢慢我都無咩所謂,始終呢個世界總唔會個個都鍾意你,你都唔會鍾意哂所有人。

有人會笑你,咁就一定會有人欣賞你,定律黎嘅。

 

事實上,我係新蒲崗個邊發現有一間西餐廳,由兩公婆打理,鍾意開就開,唔開就唔開,最重要,佢地主打係做早餐生意。

你嘅夢想,其實可行。

 

最後,希望集合大家力量,比我中六合彩,至多中咗我轉做全職寫野,兼初一十五入教堂丫唔該!

marksix.jpg

arrow
arrow

    吹水皇 發表在 痞客邦 留言(0) 人氣()