其實好多年前，我自己都寫咗份關愛座嘅文章。唔止我，好多文人雅士都有寫過。
但我真係唔明，點解咁多年之後，大家仍然都係喜歡影人坐關愛座。
再次深思，就發覺呢種人多數都係好欠缺存在感嘅人。
＊全民記者＊
智能機嘅出現，將巴士呀叔呢件事無限複製，不論有理或無理總之食花生就對了。
我會唔會坐關愛座？會
但我會唔會避嫌？會，因為我仲未想出名住，雖知呢個社會早就變咗全民記者，全民法官。
佢地出街每日都好期望有呢種事可以出現係佢地面前，好等佢地可以「伸張正義」
所以每次卡車人一多，我就自動起身，唔理你地邊個有需要，自便啦下。
呢個係我自己嘅方法，好與唔好大家可以自行判決，但一旦見到有坐關愛座就要影人，我賤格啲講呢種多數都係廢人。
點樣分你係咪現代人？
人類原始本能反應，遇到危險或驚嚇嘅事情，多數停一停身邊動作再作打算，再決定逃走或者還擊。
現代人類嘅本能反應就立即拎手機影片。
唔係我吹水，如果唔係點解成個facebook都可以咁多打架鬧交，甚至連爆炸，跳樓都會有片？因為佢地全部都係一班準備隨時犧牲自己嘅偉大戰地記者黎架嘛。
＊影住Ｘ，無Ｘ用＊
影關愛座嘅人就同呢埋戰地記者唔同，佢地明明覺得心有不公義（佢地覺得）但就決定靜雞雞影人地，放上自己facebook一齊插佢，起佢底。
為乜？「伸張正義」？
某程度上只係為左自己個facebook多Ｄ人黎睇。
但要佢地親口同人講句：「唔該讓個位黎，可以嗎？」
比個天佢地做膽都唔敢。
我可以想像到呢種人可能見到強姦，殺人都可能諗住拎機影片為先。
「殺人事小！！無片是大呀！！！」
＊正義或者好平常＊
唔知呢種人諗乜，其實要做件好事可以好簡單。
我見過有位先生真係行過去同一個真係好專心玩手機嘅人講：「呢位太太有ＢＢ，你可唔可以讓座比佢？」
然後個個人就立即起身讓座。
呢個情境我一直都記住係個腦到。
一件好事，正義，其實可以好平常。
（事源我又見到人批鬥人，人類總是……咳咳）
留言列表
