吹水王的後花園

一位後生仔見工，因為老闆開會遲到而憤然拍檯走人，然後話「你地奴性真重！」

屬真屬假就由自己判決。

但故事一出街，所有人一面倒咁覺得個後生仔有問題，唔捱得，唔識死，總之負皮多。

但我自己再次深思呢件事，其實跳出固有思想，發覺呢個後生仔嘅想法有如一位革命家一樣。

首先，呢位後生無做任何不負責任嘅行為　－　遲到，因此佢認為對方都應該準時。

呢樣野合唔合理？

從大眾嘅反應覺得唔合理，包括我自己。

「返工係咁架啦！」

「等老闆係好應份。」

「你黎求我喎。」

呢三句說話都隱藏住一件事：不成文嘅潛規則。

＊慣性與奴才＊

人類係一個習慣嘅動物，只要習慣左，乜野都會變得合理。

只要某日人習慣左，你會覺得有人係條街到痾屎係合理；你會覺得有人撞死人之後，嚮老豆個朵，警察放人係合理；你會覺得一位個主席利用職權去打尖做手街係合理。

免費ＯＴ，收工都仲要答老闆Whatsapp等等都係合理，因為大部份人都係覺得呢樣係工作嘅一部份，而我嘅工作就係不斷咁去接受一樣唔合理嘅事。

假如，老闆某日遲／唔出糧，你會唔會覺得合理？

會，因為以前嘅年代就係咁。

所以香港先會立法，禁止一切拖糧，欠糧嘅行為，再次引申到工人權益。

同一件事，當日第一個話要準時出糧嘅後生仔，都極有可能被人話佢唔捱得，係廢青。

＊英雄工作＊

不過現實終歸現實，呢種咁有型嘅工作態度係依家嘅社會的確好難生存。

有氣魄嘅英雄，永遠都係要死在萬刀之下，呢一個就係定律。

而一個有氣魄嘅英雄就應該做返一份有英雄感嘅工作　－　　紮鐵

呢句說話無任何不敬之意。我有好多朋友，包括我老豆都係做紮鐵。

而紮鐵或者呢類型工作嘅朋友，從來無人夠膽同佢地講免費ＯＴ呢份事。

因為只要夠鐘佢地就走！

如果有人要求佢地免費開工……聽講就應該無人夠膽向呢班真漢子講呢個要求。

佢地顯示出嘅，係勞動人口嘅團結，同一股英雄嘅氣慨！

係我地奴性重定係佢地太年輕，呢件只有將來嘅先至可以決定到。

但我只可以肯定，我依家就要繼續被奴役，拜拜。