以前讀動畫個陣大家以前都會主力討論［鋼鍊］同［火影］，但自己最憎追漫畫，睇到一半頂住頂住又要等成個月先有新出，一個唔好彩你愛上嘅係冨樫義博呢種仆街仔，真係要等到個孫燒比你先有得睇。
不過岸本齊史呢位作者都算有啲良心，唔選擇繼續拖拖拉拉，無謂走個種死極都死唔去，主角無限升level嘅蟑螂式伸延。
由嗚人幾歲讀幼稚園忍術學校到嗚人做埋火影生埋仔嘅故事，結構都算係完整，不少抨擊佢嘅忍術有矛盾之處但我認為寫得科幻超現實，少許反駁就真係無可厚非，我最想講嘅係入面人物性格設定。
有別於我班朋友，佢地永遠只係討論佐助定嗚人，頂多比你加埋小櫻，同當年Twins一出，個個係到問我會揀邊個？我答案係兩個都無興趣，我一定係揀張柏芝（人地姓陳，我姓陳，我淨係可以係電腦到Ｊ人，人地就可以Ｊ到出圖，呢種係就叫高LeveL）
言而兩位主角係我心目中排名，其實係偏低。
第一位：奈良鹿丸
鹿丸係眾多同期木葉忍者中第一個成為中忍同上忍嘅人，聰明才智受到火影同一眾人所欣賞。
佢呢種人夠哂現實，又佢無兩位主角咁離地，表現出一個聰明但懶懶行嘅性格，的確世間上好多聰明人都會有呢種性格。
影子模仿術威力唔勁，而且鹿丸本身戰鬥力都係低個類，但每次執行任務時候都利用個腦發揮出最大威力。
不過呢樣只係次要，最重要係怕麻煩嘅性格真係同鄙人一諗樣，自自然然望住鹿丸就好似望住自己咁。
每次諗起鹿丸最出色，都係單拖了結飛段呢一幕：
如果比佐助或者嗚人，又唔知要炸爆大半個森林先可以解決到呢個曉成員，但鹿丸細心分析同冷靜認對將飛段最引以為傲嘅不死身，反其行而將對方一軍，將佢長埋泥土為亞斯瑪老師報仇。
口是心非，日講麻煩但自己就係最勤力最肯付出個位。
呢個角色相對比起嗚人個種永遠都要講肉麻說話黎說服敵人，鹿丸其實更加有魅力。
第二位：大蛇丸
木葉三忍，天才忍者，係漫畫中其中相當重要嘅反派。
由佢每次奸笑，同目標不擇手段嘅性格，真係好香港人。佢搞咁多野，令自己要得到永生，其實就係為咗了理呢個世界嘅真理。
當佢立下心場要做呢條件事，一切道德觀念都決定放棄，其實呢種人非常有上進心。之所以話佢好香港人，就係呢種咁嘅性格，真係似某種人金錢至上，搵上位乜都夠膽做，雖然咁講比較難聽，但我肯定佢唔會係一個得把口嘅道德撚先囉。
故事中大部份禁術同人體實驗基本上就由大蛇丸一手包辦，半藏隊長（即第一代火影實驗體），志村團藏（木葉高層）都係由佢開發。加上穢土轉生一招真係玩死人又『玩死人』。
大蛇丸同呢種死極都死唔去，賤格得黎又好有上進心，其實真係同香港呢個社會絕對岩Channel。
第三位：赤砂蠍
第一個死亡的曉成員，天才傀儡師，藝術家一名。
講佢就一定連埋地達羅一齊講，呢兩條友埋牙就要爭論藝術嘅真諦，坦白啲，我係比較支持蠍（藝術就是爆炸真係有啲膠）
蠍嘅理論不外乎都係用戰利品黎做標本，再做武器。其實呢個思想比較似以前土著將敵人頭骨用作杯具或者將大腿骨作矛。相對地達羅嘅黏土，蠍嘅傀儡似乎更多元化。
兩位同樣為藝術犧牲，地達羅自爆，蠍就將自己變成為傀儡（最後被勘九郎回收成為新武器）如果地達羅自爆炸得死佐助，我會判地達羅贏。不過兩位為忍者藝術界付出，絕對可以成為業界中嘅翹楚。
當中三個係全套動畫中我最喜歡，睇住佢地三個人出場令我感覺到綠葉有時係有feel過主角，可惜蠍早死唔夠精彩。
下集我就講下火影兩位主角漩渦鳴人同宇智波佐助。
留言列表
