吹水王的後花園

大家好，我一個春秋時代嘅楚國人。

每年呢個月某日，都會有一大班人圍埋唱歌，一股熱情澎湃，一份感動同希望，賣嘅係正義，講嘅係道理：因此成為最佳嘅銷售項目。

唔知幾時開始，悼念端午節都要由某個人，帶去某個位到食糭，個個先叫「悼念端午節」。如果我要係另一個地方講屈原，為屈原去平反，就比個班人話我唔尊重屈原，唔尊重端午節。

當日屈原為咩而死，大家心裡有數。唔係因為無錢買樓而死，而係想為呢個國家付出多少少野，向國家為人民去要求多少少野。

最後佢被人殺死。

係呀，屈原唔係自殺，佢係被馬車撞死。今時今日仲有好多楚國嘅官員都話當日屈原係自己跳落河，城門無死過人。

其實係，當日佢一個人頂住四，五架楚國嘅馬車，為嘅就係唔比班楚國士兵入城。

到今日，搞「悼念端午節」班人好似變左搞演唱會咁，完全唔記得咗呢件事係因為乜野而發生。

最無恥嘅係，佢地會等到民眾唱到highhigh地就叫人捐錢捐乜。

我心諗：乜報仇要捐錢嘅咩？

最後發現呢個演唱會除左比班人發下國難財，就係比另一班人以為每年去「悼念端午節」所有事都會解決，楚國嘅狗官就會怕你。

事實係佢地每年端午節嘅時期，一邊食下糉，一邊睇下你班傻仔唱歌。唱完歌，你地第二日就繼續返工返學，當無事發生。

佢地不知幾想你地年年都搞，搞得越大越好。

楚國人就係咁，我亦除左寫低今日嘅感覺之外亦都無能為力。

唔好問點解楚國人會用廣東話同繁體字啦！個啲無文化嘅種族先至會睇唔起我地用呢啲語言同文字嘅姐。

（以上故事純屬9ＵＰ，如有雷同只是影射）