吹水王的後花園

故事背景請參考＜＜笨驢效應＞＞

每年呢個月份，村民帶住自己嘅驢仔出黎遊街表演，為嘅就係呢個才藝比賽參賽資格。

開始時，村民都不斷咁吹噓自己幫隻驢仔做左幾多訓練。

「我隻驢仔好叻，我一個星期帶佢地去足１０個訓練班，琴棋書畫，佢樣樣都學哂！」

「我個隻仲叻，唔夠三個月大我已經迫佢去學其他外語，佢已經可以同其他馬，牛，羊溝通。」

「你地都唔夠我個隻叻，為左佢可以學得更快，我專登使左幾千萬銀兩搬去大草原附近，你知道啦，個邊驢仔訓練學校優良好多架嘛。」

當大會公佈左才藝比賽參賽資格，成功入圍嘅人就會顯得格外興奮。

其他村的人都知道每年有此盛事都會紛紛走黎湊熱鬧，佢地就會開始關心下班村民有咩感受。

「無架，我地對驢仔好好架，我使好多錢同時間係佢地身上，只希望佢地有個好嘅將來。」

外來人都不禁問：「咁佢地學咁多野，會唔會好辛苦？」

村民一聽，大笑起來：「傻啦，驢仔點識分辛唔辛苦，佢地無感覺架嘛，最辛苦就係我地，又出錢又出時間。不過無架，佢地入到圍，我地就安樂哂。」

外來人當中，有位小朋友帶住自己嘅小驢黎到參觀，見到呢班村民私心極重，忍唔住開口問：「你地為左自己開心，令到佢地咁辛苦，你地會唔會有少少內疚？」

眾人一聽，勃然大怒向住呢位小朋友破口大鬧

「你個細路，識乜野！？」

「我地係為佢地將來好咋！」

「你自己隻驢無能力就唔好係到笑我地！」

小朋友受到盡各種責罵，只好乖乖地帶住自己嘅驢仔離開，後來呢條村嘅驢仔變成點，呢位小朋友唔會關心，亦唔會過問。