愛情會令人失控，對一個只可遠望對方嘅愛情更加令人失心瘋。無奈，世人都係鍾意自殘。
貪戀一個神，可以犧牲自己所有，都唔去選擇愛一個凡人。
Fion就係個個人
Fion不論外表同內涵都有唔錯嘅質素，談唔上係絕色美女但一定「搭得杯落」。但可惜佢性格就係充滿住自殘傾向。
＊神的無情＊
Fion以前都同我透露佢對公司某個合作拍檔好感興趣，我直接啲講 － 佢見親人地都出哂水。
對方有錢有家底高大有學歷，名符其實係男神格（酸葡萄撚表示佢唔太靚仔LOL）
Fion主動向對方聯絡，不過無耐都知道對方有未婚妻。
至於呢位男神，同一般男人一樣都係咸濕同貪新鮮。見到有女埋身，絕對遵守一套「食得唔好嘥」嘅法則。
故事後半段都係啲老套到我自己都唔想講嘅劇情，但我都係會照講。
「呢場係商業婚姻，我都無得選擇。」
「我愛你，但我同你根本唔可以一齊。」
「你值得搵過比我更加識得愛鍚你嘅人。」
然後我就發現TBB嘅劇情原來唔係真係咁膠。
而我都遵守我自己一套「勸阻無效，由得你死」，而事實Fion就個日開始就要生要死。
不過最抵死係，佢從來都唔覺得個男神有錯。
當然啦，神黎架嘛，點會錯呢。
＊人的愚昧＊
愚昧嘅人又點至係Fion一人，最愚昧個個應係我個日去搵Fion，佢身邊個男性朋友。我又要直接啲講 － 兵
當晚，Fion繼續重覆男神同佢之間曖昧嘅要求，同埋無情嘅拒絕，我聽都聽到悶，諗住轉個話題，問下佢頭先條仔。
估唔到Fion突然好撚清醒咁答我：
「佢係鍾意我，但我對佢真係無興趣。」
「佢份工唔係咁有前途。」
「佢屋企環境唔係咁好。」
「對佢真係冇咩特別感覺。」
是但啦，都係一堆經濟原因同藉口，最主要，呢條仔唔係神。
但以我所知，條仔又對Fion好好，而Fion亦承認呢個係事實。
＊平凡的愛＊
人就係咁，鍾意自殘。
但我明白，呢種自殘來自於唔甘心，唔甘心去做一個凡人。
每個人都想做神，神嘅價值就係比人高，只要你有機會接觸到神，那怕只係一剎那，你都會覺得心滿意足。
因為你知道，只要你接觸神個一刻，你嘅價值已經唔再係一個凡人可以取代到。亦因為你曾經接觸過神，你唔會再願意放下身段去同一個凡人為伍。
所以你寧願一直做神嘅附屬品，直到你見到另一個神；而多數另一個神，都係會繼續咁對你，因為神就係無情。
Fion係咁，條仔係咁，好多人都係咁。
留言列表
