吹水王的後花園

「好男人必須做到的５點」

「有男人做到這１０項，就不要放棄他吧」

「你老公有２０個特點嗎，幸福婚姻就是這樣」

呢種飛機文見到標題都想嘔，但我今日真心想寫個飛機文。

睇過小新嘅人都知道，廣志咸濕腳又臭，美冴性格暴躁又懶散，小新呢……(重點仲要有一層永遠都供唔完嘅樓)

橫睇掂睇都唔似係一個幸福家庭會有既因素而偏偏呢個家庭令你開心到笑唔埋口。

你只要細心一睇，佢地兩公婆嘅婚姻先至係一場最令人感動嘅婚姻生活。

＊表面＊

故事入面廣志缺點多多，一來外表已經唔係竹野內豐呢款靚仔有型，而且身材又差，平時返工懶散，廿年黎升過一次職，仲要成ＦＦ性騷擾女同事，放假淨係識係到屋企到Hea，完全係女人們心目中第一位廢男。

美冴仲大鑊，ＦＦ程度比佢老公仲勁，幻想會有個Brad pitt咁既鬼佬過黎溝佢，鍾意講是非，成日都想唔做家務，而且仲要有嚴重既暴力傾向（記憶中除左鑽小新頭之外，仲有一招旋風右勾拳）

＊內涵＊

但事實係唔可以咁表面，盡量廣志日日都幻想被美女包圍但事實係當有女人真係埋佢身，佢係會拒絕同怕怕，佢除左鍾意睇下泳裝寫真同同事飲下酒，間中就係出去打下哥爾夫球。

美冴其實就更加好，家頭細務唔願極都會落手落腳做，自己手袋靚衫自己儲錢買（雖然比人踢爆過收埋成屋郵寄貨品）

最令我感動就係有集美冴想買靚衫決定去做兼職，但係份工就相當受氣，最尾佢辭職唔做個份霸氣同唔造作真係令人一眾打工仔驕傲。

由於工作關係佢需要將小新放到託兒所到照顧，但最後小新太掛住美冴而喊到豬頭咁就決定繼續做返個全職主婦。

其實兩個人缺點多多，但其實係口是心非，只要懂得欣賞同尊重對方，係咪王子同公主又有咩所謂呢。

何況，仲有個超級天才既仔囡，人生無悔囉～