吹水王的後花園

本皇已經好少少少少少少睇電視，尋晚咁岩見到大台有個節目講啲生活小智慧嘅野甚感興趣。心諗：「幾有質素喎」

正當我繼續睇，突然之間諗起鮑起靜。

點解？點解會諗起鮑姐！？

屌你老味，咁似個「已故台」個「乜乜大發現嘅」！？到我之後上網去搵下資料，唔係似咁簡單，直情係抄咁滯。

＊大台＆已故台＊

我必須承認，細個係好鍾意睇大台，主要原因就係覺得大台係清啲而且我成日嫌已故台有陣「陸」味。同樣係星期六播係周星星啲戲，我都係寧願睇大台都唔肯睇已故台。

不過有樣野不得不讚以前已故台做野真係幾有質素，由今日睇真Ｄ，百萬富翁等等，基本上大台有乜抄乜，完全唔需要有任何嘅猶豫。

尤其依家已故台完全死亡，佢地製作過嘅野有如一個輕熟女未亡人，等緊比嗰個毫無道德底線嘅痴漢，徹底地強姦。

呢個情況令我啟發到，個間「名創乜物」一定會成功，而且好成功。

因為呢種就叫「創意」

＊創意＊

記得以前學設計，有個老師好坦白咁講：「神創造人，人創造其他產品，某程度上我地所有野都係抄返黎，只不過有人改得好，有人改得唔好。」

我當時都冷笑一聲，繼續玩ＣＳ。

只怪我不求上進，如果我當日真係了解到呢句說話嘅真諦，或者今日有幾億市值嘅「神抄之塔」就係我！

每日都有人同我講，香港係需要好多創意產業，但偏偏負責管理呢件事嘅人就係一班毫無創意嘅官員。

叫班無味蕾嘅去試食，難怪香港有間叫９記牛腩可以咁出名，賺咁多錢。

＊耐性＊

傻啦，創意係需要時間同研究，而係香港呢個地方其實最欠缺嘅就係「耐性」

人地韓國娛樂界花幾多時間同資源，先可以訓練到一個好似G-Dragon呢種明星。香港有冇G-Dragon？有

當G-Dragon紅左個陣，就自然會有，未紅絕對唔會有。呢種「同類產品」依家係市面上係有幾多？

有如同個班玩股票人講：

「Ａ公司，廿年就之後可以搵大錢，而且所有野都係屬於你。」

「Ｂ公司，三日後就升到仆街，同時亦都會可能跌到仆街。」

傻都知道，一個香港人會點揀。

一定要快，快快！

唔止！

最重要係，會有班「精英」同你講：「傻架！？自己做？你梗係等人諗完試完改完之後拎黎做架啦！」

點解香港出唔到Steve Jobs 呀？因為Steve Jobs都去咗炒iphone  LU。